قيامت

يارب بو نه جور و نه جنايت  ، نه جفادور

ملک و ملکوت اهلي بوتون غرق عزادور

ياپراق کيمي انسان توکولور توپراغا اما

بير کيمسه ديين يوخ بو نه جرم و نه جفادور

گويا کي قيامت قوپوب اولدوزلار آخيرلار 

داغلار ديديليب يون کيمي  هنگامه بپادور

قرباندي ياتيب يان يانا  باشلار کسيليبدير

هر سمته باخيرسان ائله بيل کوي منادور

بوردا نه شيرين ديل بالالار  قانه باتيبلار

بوردا چکيلن داغدي ،يارا اوسته يارادور

بوردا بالا قيزلار تئلينه شانه چکن يوخ

قان بوردا فقط تئللرين اوستونده حنادور

نالان، آنانين پيکري اوستونده بالا ، گاه 

گريان بالانين نعشينين اوسته گاه  آنادور

بوردا چکيب آغوشه ياتان توپراغين آلتدا

نازلي بالاسيلان اوره گي داغلي  آتادور

حکام يهودي ائله بيل حرمله و  شمر

غزه ائله بيل قتلگه  کرب و بلادير

تاريخ گوزي بير بئله بيداد  گوروب يوخ

بو محنته حيرتده قالان ارض و سمادور

ديللر  لال اولوبدور نيه بير کيمسه دينن يوخ

بير کيمسه ديين يوخ بو نه هاي دور نه صدا دور

آيا بولارين قانلارينين رنگي آتيبدير

يا آيريلارين قانلاري پر ارج و بهادور

واردير دينه ني دينميين باوريميز وار

يعني بو سکوتون اوزي بير بانگ رسادور

قانلار بئله فکر ائيلمه حاشا باتاجاقدير

سئل تک آخيب ائولر ييخاجاق حکم خدادور