قارقا کهليک اولدي

دوندي عجب زمانه، دنيا رُمانتيک اولدي

غيرت اولوب عَتيقه ، عفّتده آنتيک اولدي

گئتدي قديم رسومات، آلدي جهاني آفات

پالچيخ دووارلار اوشدي، ائولر سراميک اولدي

فرهنگميز دونولدي، ديرينه آيين ئولدي

شمع صفا سونولدي، کاشانه تاريک اولدي

غربين دَسيسه‌سيندن، ملّت چيخوبدي ديندن

ماهواره اولدي موشک اسلامه شلّيک اولدي

سن جنگ نَرمه بير باخ، وار ماشه‌ اوسته بارماخ

آخر بو خَشم شبده، اُعجوبه تاکتيک اولدي

قول قيچ بوتون تَاتودي، تَلبيغِ (من وَ تودي)

گور نه گوزل هنردي، هامّي گرافيک اولدي

الله وئرن جماله، ايلور بشر اِماله

ائتدي عمل ماشالله اعضاسي فابريک اولدي

لاغرلشوب يوغونلار، خيردالديلار بويونلار

لبلر پروتز اولدي، گونه پلاستيک اولدي

بيگانه‌لر چاليشدي، اَرکک ديشي قاريشدي

گُنلر قالين، کمرلر گئتدوقجه باريک اولدي

آغ بيرچَک آرواد اوخشور، بير نوعروسه به‌به

دوخسان ياشيندا زاهد باخدوقجا تحريک اولدي

چوخ ظاهره اينانما، هر نانجيبه يانما

آرايشين گوجوندن هر قارقا کَهليک اولدي

يول کوي ياره سالديم، تا بلکه گويلين آلديم

يول وئرمدي رقيب‌لر، جادّه ترافيک اولدي

مُددان دوشوبدي ياشماخ، بيگانه‌دن نه قاشماخ

آچ باشووي دئسونلر، به‌به تيپون شيک اولدي

مصنوعي اولدي قاشلار، باشلاره دوشدي داشلار

داي آخرالزّماندي، تَعجيل نزديک اولدي

کيم دوشدي اِختلاسه، پاسپورت آلوب خلاصه

فوراً گئديب مُقيمِ، تايلَند و بلژيک اولدي

قالديخ دالا هميشه، چکدوخ کراک و شيشه

يولداش بو يولدا حوقّا، قارداشدا پيکنيک اولدي

خان گئتدي خانماندان، ال چکدي خانداندان

وُرّاث چرمالاندي، دارايي تَفکيک اولدي

توپراقلار آتدا ياتدي، دنياني گوزدن آتدي

قبرين ايچي قرانليق، اوستي موزاييک اولدي

(فرهادي) سنده يالوار، اللهه تا نفس وار

بلکه سنه جزاده، حقدن کومکليک اولدي