آي آراز طوفان ائله !...

آي آراز، بير دالغا وور، دريا كيمي طوفان ائله

ظالمين ييخ قصريني، اؤز باشينا ويران ائله

زوره محكوم ائيله ‌ييب، ايندي طبيعت بيزلري

زور دئين جلّاد ايله، بيزلر آرا ديوان ائله

بير هجوم ايله داغيت، شيطانلارين كاشانه‌ سين

او فساد و فتنه قصرين، خاکيله يكسان ائله

وئرمه امكان بوندان آرتيق هر شرفسيز انسانا

آز بو يولسوز كسلري، دل مولكونه سلطان ائله

تؤكدي ناحق، سئل كيمي بيهوده قارداشلار قانين

كئچميشي سال خاطره، بير قانه يوز مين قان ائله

سو ده‌ييل سندن آخان، قانه دؤنن گؤز ياشي دير

بو اَسَف احوالي گؤر، طوفان قوپار، عصيان ائله

بير ـ بيريندن، سن بو قان قارداشلارين سالدين اوزاق

گل بو سرگردانلارين، هر مشکلون آسان ائله

بير قيليج تک اورتادان كسدين محبّت رشته ‌سين

آز بو ميداندا شرارت مركبين جولان ائله

قاضي اول، انصافه گل، حكم زامان وئر تازه‌‌ دن

غصب اولان تورپاقلاري، وابسته‌ي ايران ائله

كؤكلمه هجران سازين، دل سوزوني آرتيرما چوخ

وصلدن سال صحبتي، گل چاره‌ي هجران ائله

قارداشي ـ قارداشا چاتدير، جاني هجراندان قوتار

بو آغير بير خسته ‌ليک ‌دير، خسته‌يه درمان ائله

نه «‌شمالي»‌ نه «جنوبي»؟ آت بو چيركين سؤزلري

ملک ايراندير تماماً، دونيايا اعلان ائله

لعنت او شاهه كي، وئردي باده ايران مولکوني

ياده سالديقجا او شاهي، لعن ائله، افغان ائله

فتحعلي شاه ائيله‌دي، فاحش خيانت ايرانا

سنده خدمت گؤستريب، نقصانلاري جبران ائله

توركمن چاي پيماني، بير ننگ دير تاريخده

عُرضه ‌سيز شاهين ايشين دونيايه سن اعلان ائله

كئچدي اون يئددي شَهَر روسيّه ‌نين چنگالينا

بو جناياتي گتير ياده، بوگون عنوان ائله

گلستان پيماني‌دا سينديردي ايرانين بئلين

بو ايشه باعث‌لره، يارب اؤزون ديوان ائله

گل گتير بو ملّته آزاده‌ ليک فرمانيني

ملك ايراني صفاده روضه‌ي رضوان ائله

تهمت و تحقير اوخي، هر سمتيدن ياغماقدادير

سينه‌‌وي بير داغ كيمي، بو اوخلارا قالخان ائله

يا اؤزون چک بير كناره، غصب اولان مرزي گؤتور

يا ايكي روحي سازاشدير، دل‌لري شادان ائله

«‌شيدا»نين دائيم فراق ياردن آغلار گؤزي

گؤستر اول شوخون جمالين، گول كيمي خندان ائله.