زيور خلقت

اِعتبار و شَرَفِ کون و مَکان فاطمه دور

مَفخَر عالميان ، جان جهان فاطمه دور

يارادان بو خانمي عالَمه زيوَر يارادوب

کلّ نسوانه بِحق دَهريده سَروَر يارادوب

ساقي کوثَره زَهرا کيمي هَمسر يارادوب

شاني عالملري حيرتدّه قويان فاطمه دور

اشرف کُلّ خلايق شه بطحا بالاسي

عالَمون سَروَرينون هَم بالاسي هَم آناسي

سويليوب فَخريله زَهراسينه قربان آتاسي

خاتم مرسل ايچون پاره جان فاطمه دور

سوره کوثري شانونده خدا ائتدي عَطا

اهل کَفري بو عَطائيله اِيدوب حَق رُسوا

شاد اولوبدور بو گوزل نِعمَته قَلب طاها

شَاني گون تَک اولان عالَمده عَيان فاطمه دور

عِفت و حُجب و حَيا بَحرينه زيبا گوهر

عِصمت ومَعرفت وعِشق و وَفايه مَظهر

هَمسر شير خدا ،اون بير اِمامه مادر

بَرتَر و تاج سر اَهل جِنان فاطمه دور

مَفخر پنج تن آل عَبا فاطمه دور

مَنبعِ بَخشش وايثار و عَطا فاطمه دور

شافِع مُحترم روز جَزا فاطمه دور

جود واِحسانيده بي حَدّ و کَران فاطمه دور

خامه عاجزدي يازا بوخانمون مِدحَتيني

چوخ چَتيندور اِيده دِل شَرح وبَيان شوکَتيني

مُصطفا واجب اِيديبدور هاميا حُرمَتيني

حيف دُنياده اولان قَدري نَهان فاطمه دور

بَس که بالادي مَقام وشَرف و جاه بَتول

چوخ چَتين اَمردي دَرک اِيليه بو شَاني عقول

شَانه باخ کي اؤپوب ايگلَردي او خاتوني رسول

بويوراردي دليمه تاب و تَوان فاطمه دور

کيمدي بير بئيله رَه دين و وَلاده چاليشا

پُشت دَردَه شَرَر ظلم و جفايه آليشا

گوزده کي اشگ تَري خون دليله قاريشا

بير بله جور وجفايه دايانان فاطمه دور

صادقانه اؤز اِماميندن اِطاعت اِئليَن

هرنه اَمر اِيليوب اول امري اِجابت اِئليَن

عاقبت جانيني قربان ولايت اِئليَن

راه حقده قولي ،پَهلوسي سينان فاطمه دور

عشقيني عالمه بو يولدا عَجب ويردي نشان

اهل دنيايه بو پاک عشقي اولوب گون تَک عَيان

ماتيدور بير بيله عشقه هامي عشّاق جهان

راه عشقي وِيرن عُشّاقه نشان فاطمه دور

جِدّ و جَهديله ولايت عَلَمين ايتدي بپا

بير بِلَه همّته فَخر ايتمَليدي اهل وَلا

ايستياق حِفظ ايده بو نِعمَتِ عُظماني خدا

بَذل ايدن چون بو يولون حِفظينه جان فاطمه دور

دِينيني راه ولايتده ايدوب ياخشي اَدا

جان ويروب قويمادي تا صدمه گوره دين و وَلا

نه اؤوزي، مُحسني دَه بلکه اولوب دينه فَدا

روزوشب تير بَليّاته نشان فاطمه دور

سَن هارا ،مِدحَت زهرا هارا «رزاقي» دايان

چونکي تَعريف اِليوب حَضرتي، خلّاق جهان

سَن فقط عشقيله دِلدن بو سوزي ايله بيان

عاشقه صبح و مسا وِرد زبان فاطمه دور