بالام واي ...

اي اوچ گئجه گوندوز قالان عطشان بالام واي

تشنه کبوتر تک دوشن بي جان بالام واي

منقارون آچدون باغلادون

من آغلاديم سن آغلادون

عطشان بالام واي

پر بسته قوش تک اوچ گئجه گلدون فغانه

باخديم سنه آخدي سرشگيم يانه يانه

اولدون خدنگ ظلمه آخرده نشانه

سن مرغک پر بسته سن

دينجل بيرآز يات خسته سن

عطشان بالام واي

سانما ملالون قلبدن من سهل سانديم

عطشان دوداقون سوزيشين گوردوقجا يانديم

بير جرعه سو فکريله اخيامي دولانديم

من ايلديم سعي و تلاش

سن سينمي ايتدون خراش

عطشان بالام واي

چوخ سعي قيلديم يول تاپام راه نجاته

مأيوس اولوب گوز ياشلي بير باخديم فراته

چارم کسيلدي اللرون سالديم قماطه

گاهي سنه لايلاي ديديم

گه اوخشاديم ايواي ديديم

عطشان بالام واي

اي کاش بو آب فراتي قان اوليدي

ويران اولان گوگلوم کيمي ويران اوليدي

نه حرمله نه زهريلي پيکان اوليدي

نه اوخ اوليدي نه کمان

نه سو نه ظلم بيکران

عطشان بالام واي

نالم اوجالدي چرخ بد بنياد اليندن

يانديم ديديم بو روزگارين داد اليندن

ديلسيز بالام قورتولمادون صيّاد اليندن

ظلميله کسدي چاره مي

صيد ايتدي شير خواره مي

عطشان بالام واي

ظلمونده طغيان ايلدي آل اميّه

عمرومجه شِکوه ايلرم خلّاق حيّه

کاش گورميه اوخ ياره سين نازلي رقيه

سويلر قان اولدي گوز ياشيم

واي شير خواره قارداشيم

عطشان بالام واي

ياندوردي يانميش قلبيمي نار ملالون

پوزدي پريشان حاليمي آشفته حالون

صولدي سارالدي ظلمله گل تک جمالون

اي سينه مون خندان گلي

دلده قالان دل نيسگلي

عطشان بالام واي

سن شمع دل افروزيدون بو محفليمده

نور رخون خاموش اولوبدي منزليمده

سوز گدازون شعله سي قالدي دليمده

اولدوز کيمي باتدون اوغول

چوخ آغلادون ياتدون اوغول

عطشان بالام واي

«اصلي» بير عمري ايلدون دنياده عصيان

آخر سنه لطف ايلدي خلّاق منّان

قوي آلنيوي توپراقلارا شکر ايله هر آن

هر وقت دوشسن مشگله

بو واگيري تکرار ايله

عطشان بالام واي